اذهب للمحتوى

Toggle shoutbox هاتف مزيكا

أخر المشاركات


QuickTime Real Player windows Media Player Winamp
barbekan80 : (21 October 2014 - 09:29 AM) مساء الخيرات
نادر منصور : (21 October 2014 - 07:53 AM) سلام شباب كل سنه طيبين
alfarrash : (21 October 2014 - 07:01 AM) مساء الخير
alhsas : (20 October 2014 - 10:54 AM) مساء الخير
Joudah : (20 October 2014 - 09:17 AM) اخوانيات
MoHd.HaShiM : (20 October 2014 - 07:01 AM) السلام عليكم
MoHd.HaShiM : (20 October 2014 - 07:01 AM) :)
علي محمود : (20 October 2014 - 12:35 AM) معليش انقطعنا يا شباب ورونا الحاصل شنو يا عرندس
علي محمود : (20 October 2014 - 12:34 AM) جيت احمل اغنيه لطه سليمان قال لي المرفق ما بتحمل سجل عضويه جديده او اتصل بالاداره ..الحاصل شنو يا طارق هاشم
علي محمود : (20 October 2014 - 12:33 AM) كيفكم بعد طول غياب وكل سنه وانتو بالف خير
علي محمود : (20 October 2014 - 12:32 AM) سلام عليكم يا شباب
عرندس : (19 October 2014 - 02:18 PM) نعم
alfarrash : (19 October 2014 - 10:39 AM) عرندس ؟؟؟
alfarrash : (19 October 2014 - 10:39 AM) السلام عليكم
atefgafar : (19 October 2014 - 06:34 AM) السلام عليكم
محمد الانصاري : (18 October 2014 - 07:13 PM) ريفريش مركز البث
محمد الانصاري : (18 October 2014 - 07:10 PM) :SnipeR (23): :give_rose:
محمد الانصاري : (18 October 2014 - 07:10 PM) :h-21: :h-21: :h-21:
محمد الانصاري : (18 October 2014 - 06:59 PM) :h-21:
محمد الانصاري : (18 October 2014 - 06:58 PM) بث تجريبي مع الرائعة عاايدة زين :SnipeR (23):
تغيير حجم الهاتف

تعالوا نقرأ قصة الطفلة (أم شوايل) من جديد


عدد ردود الموضوع : 11

#1
إبراهيم عمر

    عضو كامل

  • فنان محترف
  • PipPip
  • 104 مشاركات:
" الفرج بعد 40 يوما من الشدة مع الجوع والوحدة والخوف والهوام والظلام "

قُلْ لَنْ يُصِيبَنَا إِلَّا مَا كَتَبَ اللَّهُ لَنَا هُوَ مَوْلَانَا ۚ وَعَلَى اللَّهِ فَلْيَتَوَكَّلِ الْمُؤْمِنُونَ


قصة الطفلة (ام شوايل) بعد خروجها من البئر في ارض رعوية قبالة منطقة ام سنطة محافظة سودري بكردفان وحتى وصولها الى مستشفى عبدالله الطيب بالخرطوم.حواراً مع "عبدالخير سعيد" الرجل الذي اخرجها من البئر، فكشف اسرار وخبايا وتفاصيل مثيرة عن وضع الطفلة داخل البئر.. فإلى تفاصيل افاداته.
فتاة فى الحادية عشر من عمرها تقريبا كانت ترعى مع والدها الغنم قال لها والدها لما اضاعت اربعة اغنام من مراحه الكبير: تلحقي امك وللا ارميك في البير؟ اختارت الطفلة (ام شوايل) ، بإلهام رباني البئر بديلاً عن الموت واللحاق بوالدتها المتوفاة .
فذهبا الى منطقة خارج القرية حيث توجد بئر مهجورة منذ سبعة أعوام فقذف الأب أبنته داخل البئر ، سقطت (ام شوايل) في البئر وكان فيها غصن الشوك الملفوف ، فأصبح لها (زريبة) حمتها الهوام والطيور والثعابين. وظلت داخل البئر أربعون يوما ، لم يعرف احد بأمرها حيث ظن اهلها انها اختطفت او اكلها الذئب ، وقضت كل شهر رمضان داخل البئر حتى مر احدهم يرعى غنمه فى اليوم الأربعين فسمعت صوت الغنم فأصبحت تصدر اصواتا عل احدهم ينقذها فجاء الراعي للبئر وهو يعلم أنها مهجورة ولكن لكي يتيقن من الأمر فنادي للداخل : هل أنت جن أم انس ؟؟؟؟ فردت الفتاة بأنها إنسية وتحتاج لمن يخرجها
عبدالخير، كيف علمت بوجود الطفلة (ام شوايل) داخل البئر؟
- حدثنا صبي (جفت) اغنامه ناحية البئر، فحاول تغيير اتجاه سيرها باستعماله لفرقاعات صوته (فرطوق)، وما ان بدأ يفرقع بسوطه حتى سمع صوت صرخة من داخل البئر، فحضر وأخبرنا به.
عملتو شنو؟
- اتحركنا نحو البير، سألناها، انت انسان وللا شيطان؟ قالت انا انسان.. انا (ام شوايل)..عرفتها؟
لا.. انا ما عرفتها لكن لمن سألناها ابوك منو عرفناها.
* طلعتها كيف من البير؟
- جبنا عضلة (عود كبير) عارضناها على خشم البير، وقلت ليهم اربطوني بالحبال وأنا بنزل ليها، لو بقت (ام شوايل) وللا بقت شيطان..!
* شيطان؟
- في ناس سمعوا الصوت دا قبل كده، وقالوا ده شيطان.
* البير عمقها كم؟
- زي 17 راجل (الراجل حوالي 175 سم)
* نزلوك في البير؟
- في وسط المسافة لجوه البير، كان في طير (ابورقيع) كثير شديد لمن غمضت عيني.
* خفت..؟
- لا.. انا اتوكلت على الله وقلت لازم اصل الصوت دا..!
* لما وصلت جوه البير.. لقيت شنو؟
- كان البير مضلمة شديد.. ما شفت حاجة.. طلبت نزلوا لي بطارية.. اول ما ولعت البطارية ظهرت لي ثلاثة عيون.. العين الأولى لقيت فيها ثعبان كبير كان متقدم عليّ، ولعت فيهو البطارية رجع وإداني ضهرو.. فتشت كل العيون ما لقيت حاجة.. سألتها.. انت وين.. قالت لي انا هنا.
* لقيتها وين؟
ـ ما لقيتها، قربت اصدق انها شيطان.. لكن فجأة شفت مسيرتها (ضفيرة شعرها) واقعة في الموية.
* هي كانت وين؟
ـ كانت تحت الشوك.
* صحتها كانت كيف؟
ـ كانت عبارة عن هيكل.. (كملانة من لحم الدنيا).. حاولت اطلعها من تحت الغصن، ضفيرتها اتشربكت في الشوك، ما قدرت اخلصها طلعت السكين وقطعت الضفيرة.. ربطتها من كرعيها وطلعت بيها بره.
* الحصل شنو بعد طلعتوها بره؟
ـ لقيناها بلا هدوم.. لقينا ملابسها اكلتها الأرضة.. سقيناها لبن طلعتو بأنفها.. تاني سقيناها طلعتو بأنفها، لمن جوا جماعة قالوا لينا اسقوها سمن.
* وجدتوا في ملابسها شنو؟
- ملابسها كانت منتهية نهائي، ماكلاها الأرضة، لكن وجدنا في شعرها عقربين واحدة حية والثانية ميتة.
*كانت بتتكلم؟
ـ نعم بتتكلم بعد شربت اللبن بعد السمن سألناها الرماك هنا شنو؟ قالت رماني ابوي في عشان (ودرت) الغنم.
* وعملتوا شنو بعد كلمتكم؟
ـ علمنا ورقة في شرطة ام سنطة، العساكر بعد جوا ورسموا الحادث في البير.
واغرب مافي القصة هو انها قالت كل يوم كان ياتيها رجل يلبس جلباب ابيض ويسقيها اللبن بالملح وانه لم يتحدث معها اطلاقا الا امس حين اخبرها انه اخر بوم ياتى لها لانها سوف تخرج قريبا فسبحان الله القادر على كل شئ تعظم اسمه.
بدأت الطفلة رحلة معاناة اخرى، بعد خروجها من البئر، فلم يكن الحصول على عربة لتقل الطفلة في تلك البادية امراً سهلاً. هكذا قال عبدالخير سعيد (طردنا جمال تجيب لينا مويه.. لمن وصلوا مورد الموية في ناس قالوا ليهم كنا بنسمع الصوت دا لكن تكلناهو على الشيطان). وقبل ان يصل الوفد حاملاً الماء، من مورده البعيد سخر الله لهم عربة تجوب الفيافى لم يعرفوا من اين اتت، فما عهدوا فى تلك المنطقة المقفرة عربات تحوم، فقاموا بحمل الطفلة الى الطبيب بمنطقة ام سنطة.
يحكي عبدالخير -الرجل الذى اخرج الطفلة من البئر وظل مرافقاً لها في كل مراحل علاجها:
ـ (الطفلة ظلت لثمانية أيام راقدة في السرير بين الموت والحياة، راقدة على ضهرا بعد اليوم التاسع بدأت تقعد شوية شوية).
في اليوم العاشر لخروج الطفلة من البئر لحق بها جدها محمد زايد ونقلها على اسعاف مستشفى حمرة الشيخ الذي مكثت فيه 27 يوماً، بعد ذلك تم تحويلها الى مستشفى سودري الذي مكثت فيه 3 ايام ثم الى مستشفى الأبيض الذي قضت فيه يومين ليتم تحويلها الى مستشفى عبدالله الطيب بالخرطوم. وهي الآن في قرية (الكرياب) وقمنا بتغيير اسمها الى آمنة بنت وهب بعد ان كتب الله لها عمراً جديداً.


اليوم اصدر البوم (ام شوايل ) للشاعر بشرى البطانه وسجلت لكم القصيده لتكتمل القصة

وإليكم مقطع من قصيدة أم شوايل

وده رابط الحفظ :

اضغط هنا او اختار حفظ باسم لحفظ الملف على كمبيوترك

للأمانة : الموضوع لأخي وصديقي / محمد الأمين (الدقاق)

تحياتى

ملف مرفق


تم تعديل هذه المشاركة بواسطة جمال سعيد: 28 June 2009 - 05:52 AM
تم حزف الوصلات الخارجية لمخالفتها شروط المنتدى

المريخ العظيم هو الزعيم




#2
سهى طرابلس

    عضو كامل

  • نجم مزيكا
  • PipPip
  • 358 مشاركات:

اندمجت تماما مع الوص الشعرى للماساة

عبر عنها الشاعر بشرىالبطانة

ياسلام عليكم




كن جميلا ترى الوجود جميلا

الحياة مدرسة كبرى للتواصل والقيم والنبيلة

والفن رسالة حياة لمن امن بقيمة الفن



<script language="Javascript1.2">

#3
Mohanad_S

    Abo Leyan

  • فنان محترف
  • PipPip
  • 507 مشاركات:
قصة قد كاد ان تكون اقرب للخيال

#4
إبراهيم عمر

    عضو كامل

  • فنان محترف
  • PipPip
  • 104 مشاركات:

سهى

مهند

مشكورين على المرور والتعليق


المريخ العظيم هو الزعيم




#5
إبراهيم عمر

    عضو كامل

  • فنان محترف
  • PipPip
  • 104 مشاركات:

معليش يا إدارة

آسف على إنزال الوصلات

قمت بإنزال الموضوع بسرعة ولم ألاحظ أن أضعها في المرفقات

لكم ودي


المريخ العظيم هو الزعيم




#6
سهى طرابلس

    عضو كامل

  • نجم مزيكا
  • PipPip
  • 358 مشاركات:

انت وضعت درة لن تتكرر ياابراهيم

ولو عندك اعمال لبشرى البطانة

الحقنا بيها




كن جميلا ترى الوجود جميلا

الحياة مدرسة كبرى للتواصل والقيم والنبيلة

والفن رسالة حياة لمن امن بقيمة الفن



<script language="Javascript1.2">

#7
إبراهيم عمر

    عضو كامل

  • فنان محترف
  • PipPip
  • 104 مشاركات:

مسدار للشاعر بشرى البطانة



وقال الشاعر بشرى ابراهيم ( بشرى البطانة ) حين عاد الى وطنه من السعودية مخاطبا المختربين الذين خدعوه بالمظاهر الكاذبة :

السيتوها في بعد المــــكانه العاليه
ضاقت الواسعه تب مسخت علي الحاليه
أوهمتونا بي بقـــــجة شلتت باليه
أغريتونا بي كــروشا ملانه بزاليه

الشكــكني في نفسي وأحارَ سؤالي
أنا يا الليله ما شف لـي طرحه تلالي
ما شفت القدل لافـــح تويبو العالي
والاسكيرتو إلا تشوفو فوق بنغــالي

أما العزبه حالا بالمحـــل ذاكرنو
وما تشوف ها الفِقَر قبلك كتير خادعنو
من كترة نجوض البيض ويوت سالقنو
قعدنا وكت نشوف الديك بنخجـل منو

ما تطرى ام وضيب لا حولها شايله الحفه
سنتين في رجاك ودمعها اتصــــفى
عدم البوخه سالها شقــوق ونصها جف
فرقها منك آب كـــدار سجاره وسفه

عاجت الدنيا واتبدل عمـــاري خراب
نكبة حظ وجور أزمـــان ونجما غاب
أغرز إيدي في النعمه واخـــمو تراب
أقول جا القمري يا بيتاي واقبضو غراب

وقال أيضاً في الغزل:
أنا كان عندي والي ولا صاحبي صليح
كان جنزرني ما دام قلبي ماهو نصيح
بقيت في صلاتي اتذكر هواها واصيح
أنم في الركعتين والباقـي اتمو نويح

قريقس قول لو قلبي الليله طاري نديدو
واضحت حالي زي حال المتلت قيدو
لي أمل الرجوع والماضي تاني أعيدو
ولاّ حكايتي زي جمل الطريفي وسيدو

ظِبَيَّا كان بيردن فوق مشارعي ضعنها
ذخيرتو الحيه في تمرة فـؤادي ركنها
علي الماقالو خرتت من وليها رسنها
سينا مساسق النمله المواليه سـكنها

خَتَفِي الحرقصن قـبله ومزنهن رشّ
دغدغ مهجتي وضرع المـوايق بشَّ
ريدتي وحات سبيباً فوق قصارك نشّ
ما خلف لي غير طاعون وروح منقشه

الوقفت قصادي وغمــزت لي عينيها
ديسا كابي لا عند القصار كـــاسيها
الخلاني ارح طول النـــهار باريها
شوف عيني البنات مرات يشاغلن فيها

سماحة البقعه والغوش المـلون زيف
ما بنسوني مريودي الطبيعه ظــريف
حالي الليله من فرق الملمو عـــفيف
حال فرعون بعد ما موسى وصل القيف

آه يا نفسـي من هذا الأذى المـحقون
نفسي سقيمه من العافيه راقــد دون
أنا والله من فرق المـــــتبر لون
بشيل الليل نويح وارجا النهار مغبون

عندك قاهر الجــن والإنس غبيوها
هيبة عنتر الكـــل العرب هابوها
ان سلطت علي أعمار البشر ولوها
ترد الروح بعد مُلاَّكها ما يشيلوها

تواريب ليمنا كل خريف بتبطل كافيه
متين يصدف مسورنا وتفتكرنا الجافيه
نتلقاها بي لهفة قــــــلوباً وافيه
رجلا راكبه في نعالين ورجلا حافيه

يا اب حلق القعاد طولنا فيهو خلاس
لاكين للأسف قاعدين مع اولاد ناس


دفق الحِرته والبكري القلاه المحماس
وهجم اللونو أنضف من دهب عباس


المريخ العظيم هو الزعيم




#8
إبراهيم عمر

    عضو كامل

  • فنان محترف
  • PipPip
  • 104 مشاركات:

جاري البحث عن فيديو أو ملف صوتي لبشرى البطانة وسيكون بينكم في حال وجدته إن شاء الله



من ابداعات الزميل بشرى ابراهيم
عندما دعته زميلته الى عيد ميلادها



وانا من زمنا خدو مشلخ

وهى من ازمانا خدها ساده

اتعجبت سماحا مواتر

طبقات عالية وكلها ساده

وكانت بينا فوارق شاسعة

اتعارفنا

وكانت جاده

وقالت عيد ميلادى الشهر الجاى

ولازم تحضروا

قتلها خير

قتلها خيييييييييييييييييييييييييييير

ودخل فى اضافرى

تقصدى ايه بى عيد ميلاده؟

ايا ربى اتولدت يا دابا؟

يبقى الاعياد سوها زيادة؟

امكن ولدت وانا ما عارف؟

يمكن ميلاد عيسى واجدادها

يا ربى بدقوا الدلوكة؟؟؟؟؟؟؟؟؟

وبعزموا الحلال كالعاده

بس قتلها خير وانا جاييكم

وعديلة وزين

والشهر الجاى

مرق مركوبى من السحارة

داقاهو المطرة قبل شهرين

ونكت طاقيتى من العضاضة

سليتلى ثماد رقعتها زين

سديريتى ابوى مسويها لبد

فرتقت اللبده مرقتها طين

عراقى مغزوز فى الكوكار

كان سوهو وقاية وكت فازعين

سروال مدفون فى رهل العيش

ملفوف محشور بين شوالين

لميتن واديتن شطفة

شريتن فووووق فى زريبت الزين

والزين بقراتو مكوفرات تب

مدغن طاقيتى هرنها زييييييييييييييييييييييييييييين

شافتن السرة بت الهراف

طردتن وجابتن لتاف

وغضبت غضب

وعزمت اقوم

جفن ما جفن

اقوم فى الحين

مرقت ووشى مطوطو تب

وصتنى الحلة رجال وعوين

وصتنى ام نوفل لى كركار

كان تلقى ودك جيب لى رطلين

وقروشى حلف صرة وبى خيت

وصتنى حليمة بت العجبين

سروال لى محمد ورطلين بن

بنبيعلنا شي ونديك بعدين

وصانى الهابر لى مركوب

مخلوفة وسرج وكرباجين

عنقريب وموسر بى حبال قد

تيبار ومسلة وابريق طين

والناس بتوصى وغبيانة

والناس غبيانة وبتوصى

وانا ظرفى مكدر زى الطين

وبتوصى وزى بايعلى بعير

وانا بايع تيسى وعيش كيلتين

والتيس اعور ما جابلو سعر

والعيش بتاب ومسوس وشييييييييييييييييين

تتسود ختوة هالسفرة

انا ماشى لواجب اقوم بالدين؟؟؟؟

وركبت الباص مخلاتي دفس
كدوسي وحقتي وعود سكين
وانا راكب في الباص بتأمل
ياربي بجيبو الحكامات
بتسو دلوكة بيجوا الحلال
ضابحين تيران ام خرفان صر
مدققين كمين شوالات عيش
وانا مالي ومال عيد ميلادن
ان نقروا الدلوكة اولادن
انا بنزل حربي ومتعكز
وادارق اصقر في الدارات
وانا معروووووووووف خراب حفلا ت
وامسك صوتي المدهون قطران واركز واندق
شان السمحات ما يقولن ضيفنا قريزن ساكت
ووصل وسعل لامن جيتن
وهداك البيت يرقش لوحات
وصل ولقيت البيت مزرود لاحدو بنات سمحات

شايلات هديات
وحدات وردات
وحدات زهرات
شايلات رسمات في شكل ارنوب
واسودونمور سبحان الله زي الميتات
يضاحكو قر حايشين صينية تبق شمعات
ماف زول قالي انت منو مابعرفو الضيف زي الخواجات
لتيت عكازي وقفت طرف
ملص نعلاتي اتفرجختا
لي تفه خلالي مضنقلو تب سكيني ملسنه بالجمبات
تبماكي وحُقتي مزرودا ولعتا كدوسي واخد جبدات
وان بتأمل هذا العالم ياتو البنوت وياتو الجنيات
وبحرت عيني لامن برقن
كل البنوت زيها سمحات
والبقر اشابه لي ضمة
ما عرفت الراحن والفايتات
لي حسن الحظ هي النقرتني
ما شالت شك من شافتني
ساقتني وقامت بالواجب هي اصيلة وراسية وست حوبات
نادت صاحباتا بنتعارف
نانسي وناندى وشيماء ولمياء ْ وحوراء وكفا
من وين! من لندن جينا امس راجعين باكر زي ها الحظات
من الطايف والمنشية ومدينة النيل وبنوت راقيات
طيبات طيبة وكل كليمة معاها ضحيكة
ونضاااف ورهااااف زي اللعبات
واحدتاٌ فيهن سمحة سماح لكن مي طاعمة
وانا زول مستغرب في حاجات
ان زول اسراني سماحتاً كاسيا
بنت البلد الهاديه وراسية وضميرا الحي التب مامات
وقالت لي
عرف نفسك بي عبارات
عرف نفسك بي عبارات
قتليها : انا الاسد الحرس غابتو الضريا
وانا الساعة الكتال بختف حديا
وانا الدايرني مابجيب لي هديا
وسارح مدرج ام هبج التخيه
مراتع اللبل الضان السعيه
وادرج عاصفة اللقدة السخيه
وادرج عاصفة اللقدة السخيه


المريخ العظيم هو الزعيم




#9
إبراهيم عمر

    عضو كامل

  • فنان محترف
  • PipPip
  • 104 مشاركات:

هذه قصيدة اخرى للشاعر بشرى البطانة

ســــلامــــات


يالملكه ماك متزعمه
ياساريه فى الزمن النحل
ياضل على البلدات رمى
يالكادحه من أجل الوليد
شان راسو إصبح فى السما
ويالفوقا ماف غير الله شئ
وحتى الله زاتو معظما
والجنه أيه تصبح معاك
أرخص وأقل من مقدما
ودايساها بين كرعيك حبت
فى قاع مدايسك مرغمه
ويايمه شوق قطع حشاى
واوجعة الدمع الهما
إشتقتا لى مطر الخريف
وكتين حفايرو إحزما
وبهيمنا فر تال التبر
أماتو واردات الضما
كوعتا فوق العنقريب
بتشرف العيش اللتيب
والعفرا تتقاطا الرحل
منظر دواخلى يأزما
مرصوص متل عقد الكنار
منضوم على جيد السما
إتحكرتى فوق بنبر حطب
قهوة ضحا وجلسة لما
خيلانى وأعمامى الكبار
خالاتى والجد العمى
ونسه وصراحه وقرقراب
متفائله بالضل الرما
والتايا بت عوض الكريم
المالكا قلبى مقسما
منصره فى طرف الصعيف
نادتنى هيي أصبحتو كيف ؟؟
بيناتنا شاشاق الحطب
همساً دقاق مو همهمه
قالولكن
الليله أمى مكرمه
طرزتا ماراعيت كبير
عاد تايا كيف ؟؟ وإنشاالله خير!!
قاتلى شديده وإلا عيب
وسط الرجال بتناغما
وتب قبلت ماشفتا غير
كفلاً رطن كاجر الطريحه محشمه
إلا إمى واضيعة رجاك
من ولدك الطشطش عما
أنداح تبع زخم المدن
ضيّع بداوتو وحطما
وسلام من البلد السجم
سموها يمه العاصمه
ويايمه ولدك ضاع خلاص
تايه مبارى العولمه
ماياهو ضرغام الرجال
الكان قبيلتو معظما
وياحليلو روبك والسمن
ياحليل لذايذ الأطعمه
ضوّق لسانى طعم جديد
بيرغر .. وجامبو المفرمه
ومعدتى ذاتا إطوطوت
ما أظن عصيدتك تهضما
خدعتنى كندشة الوهم
حمام وريحه وهندمه
راجيانى فوق النار أقع ؟؟
وأنا هالشمس مابلزما !!
دايرانى فوق دلوكه أهز ؟؟
راجيانى أسل سيفى وأرز ؟؟
وألعب مع التوم ود حمد
صقريه درقه محكمه !!
وأنا داك بقيت سيد الرقيص
مرات قرد ..مرات كتيفتى أبرما
دايرانى بى سوط العنج
أركز مع السر وادما؟؟
إنفره سروالى البجر
أربط بتينتى وأحزما
شبال من التايا وأهز
طاقيتى شنقا وأقرما
وفوق ضهرى داداب العنج
وأصفاحى نازفات الدما
أيمه ولدك ضاع زمان
زمان
وحكايتو بقيت مؤلمه
باريت لؤى وقصى ومى
وين تانى كاكوم وادما !!
ضهرى الممسح بتلصف
راقد لحايفو منعمه
ما أظنو بتحمل لبع
والخرشه ماأظن بلزما
سروالى ماياهو القبيل
سديريتى جكه مجضمه
حاجات مجبصه كلها
وطاقيتى كاوبوى وإنما
والكاوى قلبى وشاوى شى
كان شفتى واحدى مقرضمه
لابسه البناطلين زينا
والله ماتفرزيها تب
كان فارده شنبه تبرما !!!
لكنو مهما الزول بعد
حكايتو القبيل مابهدما
جاييك وشايل بقجتى
جواها ورقه مختمه
أياهو حلمك وجبتو ليك
داك جمه ريقى من الظما
بتمنى من الله الكريم
إمد أيامك وإقدما
وتحجى فى كل عام إهل
وتعودى سالمه وغانمه
يايمه
وتعودى سالمه وغانمه


المريخ العظيم هو الزعيم




#10
سهى طرابلس

    عضو كامل

  • نجم مزيكا
  • PipPip
  • 358 مشاركات:

ابدااااااااااااااااااااااااااااااااااااع ياابراهيم

ح اخليها هنا

لكن ح اوثق لها بمنتدى الشعر بمزيكا واكمل انت المسيرة هناك




كن جميلا ترى الوجود جميلا

الحياة مدرسة كبرى للتواصل والقيم والنبيلة

والفن رسالة حياة لمن امن بقيمة الفن



<script language="Javascript1.2">

#11
إبراهيم عمر

    عضو كامل

  • فنان محترف
  • PipPip
  • 104 مشاركات:

تسلمي اختي سهي

بس لسه ما لقيت حاجة مسموعة لشاعرنا بشرى البطانة

ربنا يسهل


المريخ العظيم هو الزعيم




#12
fero

  • فنان
  • 2 مشاركات:
مشكوووووووووووووور

حقيقه ابكيتنا